Mál dagsins 1. október

Mál dagsins er vikulega á þriðjudögum í vetur frá kl. 14:30-16:00. Í „Máli dagsins“ þriðjudaginn 1. október mun stundin hefjast að venju með samsöng undir stjórn Friðriks Kristinssonar og Lenku Mátéová. Klukkan 15:10-15:30 mun Helgi Helgason, fyrrverandi kennari flytja erindi. Klukkan 15:30 er drukkið kaffi og stundinni lýkur með bæn og blessun kl. 16:00. Allir hjartanlega velkomnir.

Umhverfismessa

Messan 29. september verður tileinkuð umverfismálum. Helena Óladóttir, umhverfisfræðingur og kennari flytur hugleiðingu. Sóknarprestur þjónar fyrir altari. Óskar H. Níelsson, sóknarnefndarmaður les ritningarlestra. Kór Kópavogskirkju syngur undir stjórn Lenku Mátéová. Sálmar, ritningartextar og bænir fjalla um umhverfið. Kaffisopi á eftir í kirkjunni.

Guðsþjónusta 23. september kl.11:00

Guðsþjónusta verður í Kópavogskirkju sunnudaginn 23. september kl. 11:00. Sr. Sighvatur Emil Karlsson, settur héraðsprestur prédikar og þjónar fyrir altari. Félagar úr Kór Kópavogskirkju syngja undir stjórn Hrafnkels Karlssonar. Sunnudagaskóli á sama tíma í safnaðarheimilinu Borgum.

Frá fermingarbarni

FERMINGARFRÆÐSLAN 19. – 22.ágúst 2019

19. ágúst Dagur 1

Í fyrsta tímanum fórum við í nafnaleik með Sigga og Ástu.  Þannig gátu þau betur lært nöfnin okkar. Eftir leikinn fór Siggi yfir bækurnar sem við notum í fræðslunni fyrir ferminguna og að lokum sögðu þau okkur frá starfi prestsins og djáknans, en presturinn getur t.d. gift fólk, skírt börn og fermt unglinga en djákninn getur aðstoðað prestinn. Djákninn getur sinnt mörgum öðrum störfum eins og t.d. sálgæslu. Við tókum frímínútur og eftir það fórum við í útileiki sem var mjög skemmtilegt. Við borðuðum nesti og spjölluðum saman. Síðan fóru stelpurnar með Ástu í kapelluna og hún las upp úr kaflanum um sjálfstraust og sjálfsálit í bókinni Con Dios en þar var mikið rætt um hvað það er mikilvægt að standa með sjálfum sér.  Á meðan voru strákarnir með Sigga.

20. ágúst Dagur 2

Í þessum tíma kom Kristín frá Hjálparstarfi Kirkjunnar og sagði okkur frá þeirra starfi. Það var mjög áhugavert og það kveikti áhuga minn á að taka þátt í slíku starfi. Við fórum einnig í frímínútur.

Helga kom og sagðu frá kristniboði og sagði okkur sögur frá starfi sínu í Eþíópíu þar sem hún hafði búið í mörg ár. Eftir það borðuðum við nesti  og skelltum okkur aftur í útileiki. Þegar við höfðum leikið okkur fórum við með Ástu í kaflann um bænir og ræddum um hvenær og hvar er gott að biðja en það getur verið hvenær og hvar sem er.

21. ágúst Dagur 3

Þriðja daginn töluðum við mikið um Biblíuna með Sigga. Hann sagði okkur frá Nýja Testamentinu og Gamla Testamentinu en einnig frá því að Biblían er sú bók sem mest hefur verið gefin út í heiminum.

Við töluðum heilmikið um Guð og allir fengu að skrifa niður það sem þeim finnst Guð vera. Ég skrifaði að mér fyndist Guð vera eins og andi. Að hann væri allstaðar og fylgdist með okkur, inni í okkur öllum. Að hann gæti talað við alla á sama tíma og að hann elskaði okkur öll.

Við ræddum líka um Jesú og hvað hann er í raun og veru fyrir okkur, hverju og einu okkar. Hann býr í öllu fólki og gefur því styrk til að takast á við lífið. Og svo margt, margt fleira.

22. ágúst Dagur 4

Síðasta daginn í fermingarfræðslunni byrjuðum við í kirkjunni þar sem Siggi sagði okkur frá listaverkunum í henni. Gluggarnir eru mjög merkilegir, það tók listamanninn, Gerði Helgadóttur mörg, mörg ár að búa þá til. Og það er svolítið merkilegt að listaverkin í kirkjunni eru flest gerð af konum. Siggi sagði okkur líka frá prestklæðunum .

Síðustu tímana fórum við í leiklistarleiki með Magga og Gunnari en Gunnar leikstýrði kvikmyndinni Gauragangi eftir Ólaf Hauk Símonarson.

Við enduðum fræðsluna með leikriti sem við krakkarnir bjuggum til sjálf út frá sögu úr Biblíunni.

Þetta hafa verið mjög skemmtilegir og fróðlegir dagar í fermingarfræðslunni.

Takk fyrir.

Ástríður Embla Rögnvaldsdóttir

Útvarpsguðsþjónusta 15. september kl. 11:00

Sunnudaginn 15. september n.k. er “Dagur kælreiksþjónustu” í kjunni.  Í útvarpsguðsþjónustu kl. 11:00 í Kópavogskirkju mun Ásta Ágústsdóttir, djákni prédika og sr. Sigurður Arnarson þjóna fyrir altari.  Kór Kópavogskirkju syngur undir stjórn Arngerðar Maríu Árnadóttur.

Æskulýðsfundir

Æskulýðsstarf

Starfið er ætlað unglingum.  Fundir eru vikulega á fimmtudagskvöldum frá kl. 20:00-21:30 í safnaðarheimilinu “Borgum”.  Félagar úr starfinu munu ganga í hús í sókninni frá kl. 18:00-20:00 þriðjudaginn 29. október og safna fé fyrir Hjálparstarf Kirkjunnar.  Einnig munu þau taka þátt í verkefninu “Jól í skókassa”. Þrjár fermingarfræðslur verða á æskulýðsfundunum fram að fermingum í vor og foreldrar og forráðafólk tekur þá einnig þátt.  Fjallað verður þá um: “Ég á bara eitt líf” , “ábyrgð og að setja mörk” og “sorg og sorgarviðbrögð.